АКТУАЛЬНЫЕ ТЕМЫ: Протесты Санкции Репрессии Итоги Конституционная реформа Павел Шеремет Эпидемия
Невядомы Герой Беларусі.

Невядомы Герой Беларусі.

Першым у публічнай прасторы наш бела-чырвона-белы беларускі нацыянальны Сцяг узняў малады хлопец, імя якога засталося невядомым.

Ён сядзеў на кортках насупраць мяне ў коле людзей ў полі ля Курапатаў 30 кастрычніка 1988г. падчас мітынгу на "Дзяды". Нас было мо тысячы паўтары недзе. І з усіх бакоў нас атачыла, акружыла міліцыя. Былі нават сабакі з наморднікамі -- амаль як у савецкіх фільмах пра савецка-германскую вайну 1941-1945г.
Мы счапіліся пад рукі і прыселі, утварыўшы кола, на корткі. Здаецца, у той момант пісьменнік Уладзімір Арлоў зачытваў адозву "Мартыралога Беларусі". І вось да яго ў цэнтр кола раптам выйшаў хлопец, стаў поруч з ім і разгарнуў наш Сцяг. Гэта было настолькі кранальна, што такое не забыць. Я й дагэтуль спрабую даведацца, хто ж то быў. Пакуль безвынікова, але дзеля гісторыі трэба працягваць пошукі таго Героя. Хаця, прызнаемся шчыра, праз столькі гадоў устанавіць сапраўднае імя і прозвішча таго Героя -- шанец адзін з мільёна. Таму найхутчэй за ўсё ягонае імя і прозвішча так і застанецца ў гісторыі Беларусі невядомым: як подзвіг Невядомага салдата падчас вайны.

Прашу "СВАБОДУ", БЕЛСАТ ды іншыя СМІ гэты факт занатаваць у адмысловым сюжэце -- дзеля яе вялікасці Гісторыі. Тым больш, што сведкаў тае падзеі 30 кастрычніка 1988г. яшчэ шмат жыве.


Нагадаю, што  ўшанаваць нашых продкаў у 1988г.  планавалася  мітынгам каля Усходніх могілак у Мінску ( станцыя метро "Маскоўская") з далейшым ускладаннем кветак на магілах.  Але на пляцоўцы і подступах да могілак не далі сабрацца: туды загадзя нагналі міліцыі і адразу пачаўся разгон. Таму  сцвярджэнні пра тое, быццам бы ўпершыню  ў найноўшай гісторыі наш Сцяг быў публічна ўзняты ў той дзень ля Усходніх могілак  не маюць  пад сабой падставаў. У той дзень ля Усходніх могілак гэта фізічна было немагчыма зрабіць так, каб паўнавартасна, хаця б на некалькі хвілінаў, публічна ўзняць наш Сцяг. А ў Курапацкім полі гэта было здзейснена.


Цікава і парадаксальна,  але міліцыянты тады не наважыліся  адразу рабіць хапун, а ўважліва даслухалі выступ Уладзіміра Арлова пад бела-чырвона-белым Сцягам будучай незалежнай Беларусі.  Кажуць, што недзе і здымак  захаваўся.  Таму ў полі ля Курапатаў  павінен быць усталяваны грандыёзны манумент  бела-чырвона-беламу Сцягу.  Ён мусіць быць усталяваны  недзе непадалёк ад уваходу ва ўрочышча,  як раз у тым полі.  Ля  брамы ці агароджы, якою варта абнесці наш нацыянальны Некропаль -- урочышча Курапаты.

Ля манумента будзе  ўсталяваная адпаведная  вялікая шыльда з тэкстам, высечаным на гранітнай( ці мармуровай)  пліце залатымі літарамі.   У тэксце --  тлумачэнне  пра тую падзею, што адбылася на гэтым месцы.  І  ўзгадка пра  таго  хлопца -- невядомага Героя Беларусі,  які  ўпершыню ў найноўшай гісторыі Беларусі  публічна,  на мітынгу памяці продкаў "Дзяды" 30 кастрычніка 1988г.,  узняў наш нацыянальны бела-чырвона-белы Сцяг.  

04.03.21 15:58
Внимание! Материалы в разделе «Блоги» отражают исключительно точку зрения автора. Точка зрения редакции «Белорусского партизана» может не совпадать с точкой зрения автора. Редакция не модерирует и следовательно, не несет ответственности за достоверность и толкование приведенной информации и выполняет исключительно роль носителя.

Павел Знавец