АКТУАЛЬНЫЯ ТЭМЫ:

Парытэтбанк павінен вярнуць кліенту $600 тысяч, якія нібыта прапалі з банкаўскай ячэйкі. Але кліент няпросты!

Праблемы з цэласнасцю банкаўскіх ячэек, выглядае, ёсць не толькі ў разгромленага Белгазпрамбанка — у базе судовых пастаноў з'явілася рашэнне суда Цэнтральнага раёна Мінска ў дачыненні Парытэтбанка, які мае вярнуць кліентам больш як $660 тысяч, што зніклі з ячэек.




Фота: tut.by

На гэта звярнулі ўвагу адміністратары тэлеграм-канала Эканоміка па-беларуску, піша НН.


Насамрэч сітуацыя кшталту такой — экстраардынарная і скандальная. У выпадку Белгазпрамбанка ў 2020-м мела месца ўмяшальніцтва работнікаў сілавых структур, а што ж было ў Парытэтбанку? 

Знаёмыя з сітуацыяй крыніцы тлумачаць, што гісторыя адбылася каля чатырох гадоў таму і набыла новае юрыдычнае жыццё, калі банк перастаў належаць дзяржаве (у 2020-м Парытэтбанк купілі стуктуры Саіда Гуцэрыева — сына расійскага мільярдэра Міхаіла Гуцэрыева).

Маўляў, грошы зніклі такім чынам — работніца дэпазітарыя ўступіла ў змову са сваім хлопцам-замежнікам, які ў абазначаны час прыйшоў у дэпазітарый і з яе дапамогай ускрыў некалькі ячэек, высвідраваўшы іх.

Дакладны памер складзенага ацаніць немагчыма, бо дамовы аб тым, колькі чаго ляжыць у ячэйцы, не афармляліся — гэта таямніца.

Калі аб сітуацыі паведамілі ўласнікам пацярпелых ячэек, сярод іх знайшоўся кемлівы персанаж. 

«Сярод усёй заяўленай на той момант сумы шкоды 90% было агучана менавіта ім, тыя самыя $600 тысяч. У банку задаліся пытаннем і паспрабавалі фізічна размясціць столькі грошай у ячэйцы — не ўлазіла. Папрасілі абгрунтаваць паходжанне сродкаў — нічога не дабіліся.

Потым нібыта служба бяспекі высветліла, што ён у свой час быў судзімы за махлярства. З вяртаннем усёй агучанай сумы ў яго, натуральна, былі праблемы, бо банк не паверыў яму. Яшчэ калі Парытэтбанк належаў Кіраўніцтву справамі прэзідэнта, ён хадзіў і пагражаў адміністрацыі, што ўсіх засудзіць. Тады гэта ўспрымалася з іроніяй, імаверна, той чалавек вырашыў яшчэ раз паспрабаваць забраць $600 тысяч пасля таго, як змяніўся ўласнік», — расказаў топ-менеджар банка.

У выніку суд прыняў бок кліента.




09:55 15/04/2021


Загрузка...
Загрузка...