АКТУАЛЬНЫЯ ТЭМЫ: Выбары-2019 Змена ўраду Атака на СМІ Мінздраў: карупцыя Курапаты Пенсійная рэформа Забойства Паўла Шарамета

За што дэпутаты парламента атрымліваюць штомесячную прэмію

За што дэпутаты парламента атрымліваюць штомесячную прэмію
10.11.2017
Год таму, на пачатку сваёй дэпутацкай дзейнасці, Ганна Канапацкая і Алена Анісім публікуюць у сацсетках звесткі пра свае заробкі.

Фота Змітра Лукашука

У разліковых лістах народных абранніц увагу прыцягвае радок “Штомесячная прэмія”: за 12 працоўных дзён у кастрычніку 2016 года Канапацкай налічана 214,78 рубля прэміі, а Анісім за 21 працоўны дзень у лістападзе ― 375,87 рубля.

Праўда, нават гэтыя дзве дэпутаткі-дэмакраткі больш не публікавалі фота сваіх разліковых аркушаў. Алена Анісім не хавае, радок “прэмія” там прысутнічае штомесяц. Кожны раз з рознай сумай, але, тым не менш.

 

Цікаўлюся, за што прэміруюць дэпутатаў? Можа, за распрацаваны законапраект, унесеныя праўкі ці актыўнасць у Авальнай зале?

 

“Я не цікавілася, шчыра скажу. Па той простай прычыне, што такія пытанні часам вырашаеш, што не да таго, каб бегаць і цікавіцца. Не таму, што я такая нецікаўная: прыйшло, і прыйшло. Проста не засяроджвала на гэтым увагу, не заўважыла і не пайшла высвятляць. Я працую так, як лічу патрэбным працаваць, а ўсё астатняе для мяне застаецца за кадрам”, ― шчыра прызнаецца Алена Анісім.

 

Таямніцу дэпутацкіх прэміяльных раскрывае дэпутат Валерый Барадзеня. Высвятляецца, што прэміруюць народных абраннікаў не за нейкія дасягненні, а за кошт… “прагулаў” калег. Калі яны з той ці іншай нагоды бяруць адпачынак за свой кошт.

 

Валерый Барадзеня: “Калі Канапацкая возьме за свой кошт два дні і паедзе некуды, дык будзе эканомія, якая потым размяркуецца паміж усімі дэпутатамі [для паездкі на Форум грамадзянскай супольнасці Усходняга партнёрства Ганне Канапацкай кіраўніцтва Палаты прадстаўнікоў прапанавала ўзяць два дні за свой кошт. ― Еўрарадыё]. Гэтыя грошы нельга нікуды накіраваць, апроч як на аплату працы. Гэта не прэмія нават, а эканомія агульнага фонду. Калі вы пацікавіцеся, дык, напрыклад, старшыня Федэрацыі лёгкай атлетыкі Вадзім Дзевятоўскі ездзіць заўжды за свой кошт і амаль не атрымлівае заробак, што ненармальна як па мне. Старшыня Назіральнай рады Чырвонага крыжа, наш калега, таксама за свой кошт ездзіць і амаль не атрымлівае заработнай платы. Што таксама не вельмі нармальна”.

 

Еўрарадыё: Атрымліваецца, што грошы Дзевятоўскага…

 

Валерый Барадзеня: Я ў тым ліку іх атрымліваю ў выглядзе прэмій. Так і атрымліваецца, Дзевятоўскі бярэ за свой кошт, і па справах ездзіць, а я атрымліваю 10 рублёў лішніх.

 

Праўда, потым удакладняе, што звычайны памер прэміі ўсё ж не 10, а 100-130 рублёў на месяц. Калі гэтую суму памножыць на 110 парламентарыяў, то атрымліваецца, што дзякуючы ўзятым за свой кошт адпачынкам, штомесяц эканоміцца 11-14,3 тысяч рублёў фонду заробкаў. Гэта ж колькі “непарламенцкіх” спраў павінна быць у дэпутатаў!

 

Вадзім Дзевятоўскі пагаджаецца з калегам па Палаце прадстаўнікоў: сапраўды, па справах, наўпрост не звязаных з працай дэпутата, ездзіць даводзіцца шмат. Ён сапраўды кожны раз бярэ адпачынак за свой кошт. У выніку, атрымлівае добра калі палову звычайнага дэпутацкага заробку, не атрымліваючы нічога за сваю “валанцёрскую” працу на пасадзе старшыні Федэрацыі лёгкай атлетыкі.

 

Вадзім Дзевятоўскі: “Усе камандзіроўкі, да гадзіны ўключна, я за свой кошт бяру. Ці за кошт адпачынку. І пытанне заробку вельмі актуальнае: як жыць? Ну, неяк стараюся...”

 

Вадзім вельмі абураецца за слова “прагульшчык”.

 

“Я не прагульшчык! Нават дыстанцыйна, нават калі я знаходжуся ў сваім законным адпачынку, я заўжды жыву праблемамі зваротаў грамадзян, праблемамі калектываў ці праектамі законаў. Ці ініцыятывамі, як, да прыкладу, па педафіліі ці па наркотыках. Ніхто не адмяняе гэтую маю “цякучку”, я пастаянна ў ёй. Гэта ўжо мая праблема, як я дзялю свой асабісты час, якога ў мяне ўвогуле няма. Гэта праблемы мае і маёй сям’і, якую я, на жаль, мала бачу”, ― кажа дэпутат.

Тое, што ў дэпутатаў ёсць прэмія, Вадзіма Дзевятоўскага моцна здзіўляе.

 

“А ў нас увогуле ёсць прэмія?! Я не ведаю такога, каб прэміі давалі дэпутатам. Я, на жаль, у пастаянным форс-мажоры, і нават не звярнуў увагі. А праўда ў тым, што я пастаянна атрымліваю нашмат менш”.

 

Па словах дэпутата, ён думае звярнуцца да калег з гэтай сваёй праблемай вымушаных “прагулаў”. Бо нават у паездках па справах спорту ён, кажа Дзевятоўскі, выконвае і функцыі парламентарыя ― прапагандуе і прэзентуе Беларусь на міжнародным узроўні. А ў выніку губляе ў заробку.

 

Праўда, хутчэй за ўсё, і пераважная большасць іншых дэпутатаў можа сказаць тое ж пра свае ўзятыя за свой кошт адпачынкі. Калі гэта прымуць да ўвагі, дык і прэміі не будзе з чаго плаціць.


Дата стварэння навіны 10.11.2017

Возврат к списку