АКТУАЛЬНЫЯ ТЭМЫ: Змена ўраду Атака на СМІ Мінздраў: карупцыя Курапаты Пенсійная рэформа Справа Федынiча Забойства Паўла Шарамета

Пяць фактаў пра славутага міліцыянера Ігара Яўсеева, які стаў памочнікам Лукашэнкі па Мінскай вобласці

Пяць фактаў пра славутага міліцыянера Ігара Яўсеева, які стаў памочнікам Лукашэнкі па Мінскай вобласці
28.09.2017
Аляксандр Лукашэнка прызначыў генерал-маёра міліцыі Ігара Яўсеева сваім памочнікам па Мінскай вобласці. Да гэтага ён два гады ўзначальваў УУС Міншчыны.

«Наша Ніва» згадвае пяць цікавых фактаў з біяграфіі 49-гадовага Ігара Яўсеева.


Не першы генерал з Росі

Нарадзіўся Ігар Яўсееў у мястэчку Рось Ваўкавыскага раёна. Гэта не першы генерал з гэтых мясцін. У Росі таксама нарадзіўся брыгадны генерал Войска Польскага Рамуальд Валынцэвіч. У мястэчку ёсць вытворчасць будаўнічых матэрыялаў. Бацька Яўсеева, дарэчы, і быў будаўніком, а маці — настаўніцай. Хаця сам міліцыянт прызнаваўся, што гадавалі яго бабуля з дзядулем. «Быў распешчаным і слаба падрыхтаваным да жыцця», — так ацэньваў Яўсееў перыяд дзяцінства.

 

Пасля васьмі класаў пайшоў вучыцца ў Пружанскі сельгастэхнікум. Казаў, што ў той час быў вельмі грамадска актыўным. У прыватнасці, займаўся музеем Вялікай айчыннай вайны. Пісаў лісты і асабіста сустракаўся з многімі ўдзельнікамі той вайны.

 

Спецназ ГРУ і ахова Лукашэнкі


У войска Яўсееў трапіў у трэцюю брыгаду спецназа ГРУ ВПС (Галоўнага разведвальнага ўпраўлення Вайскова-паветраных сілаў), якая дыслакавалася ў той час у ГДР. Элітныя войскі. Развал СССР сустрэў участковым у Пружанскім РУУСе. Працаваў у ахове Лукашэнкі яшчэ ў першыя гады прэзідэнцтва. Займаў пасаду намесніка начальніка УУС Мінскага райвыканкама. Пасля стаў начальнікам Упраўлення аховы правапарадку і прафілактыкі УУС на транспарце.


Усмірыцель Плошчаў


 

Але імя Яўсеева на слыху стала пасля таго, як ён заняў пасаду начальніка міліцыі грамадскай бяспекі Мінгарвыканкама. У непасрэдныя абавязкі Яўсеева ўваходзіла сачэнне за масавымі акцыямі і іх уціхаміраванне (найчасцей шляхам разгону). Не цураўся і сам прымаць удзел у збіцці. Напрыклад, усім добра памятаецца, як ад Яўсеева у першыя дні пасля Плошчы пацярпеў фатограф Уладзь Грыдзін. Яўсееў быў адным з галоўных дзеючых персанажаў падчас самой Плошчы-2010. Ён хадзіў на перамовы з кандыдатамі ў прэзідэнты. Чым скончылася Плошча, няма нагоды лішні раз нагадваць. Пасля яе Яўсееў трапіў у спісы неўязных на тэрыторыю Еўрасаюза пад нумарам 84. А вось Лукашэнка за Плошчу даслаў Яўсееву падзячны ліст.

 

«Хлопаць можна толькі ветэранам»

 

  Пасля Яўсееў быў відным дзеячам падчас «Стоп — бензіну» і маўклівых акцый пратэсту. Каардынаваў і камандаваў разгонамі менавіта ён. Выкарыстоўваючы і нецэнзурную лексіку (глядзіце відэа; на Акрэсціна яго ніхто за гэта не пасадзіў). Перад маўклівай акцыяй на Дзень Рэспублікі Яўсееў адзначыў, што апладзіраваць можна толькі ветэранам. Разгон каля Чыгуначнага вакзала на 3 ліпеня быў адным з найбольш брутальных пасля Плошчы.

   

«Міліцыянер — гэта лад жыцця»

 

У прыватным жыцці Яўсееў жанаты, мае траіх дзяцей. Кажуць, што фотаздымак сям'і стаіць у яго на працоўным месцы. Лічыць, што «міліцыянер — гэта лад жыцця».

 

У чэрвені 2013 Яўсеева прызначылі кіраўніком Віцебскага УУС. Амаль за два гады працы ў Віцебску нічым асаблівым Яўсееў не адзначыўся, спраўна выконваў працу па бяспецы ў час «Славянскага базара».

Прыгоды з журналістамі ў Яўсеева працягваліся і ў Віцебску. Мясцовыя расказваюць, як падчас Дня дэсантніка ў 2013-м Яўсееў «заламаў» фотакарэспандэнта адной дзяржаўнай газеты, які здымаў затрыманні міліцыяй п'яных дэсантнікаў. Праўда, потым гэтага ж журналіста ўзнагароджавалі ў Віцебскім УУС за добрую працу. На гэтым канфлікт быў вычарпаны.

Яўсееў казаў, што Віцебск яму падабаецца, бо ў горадзе няма мінскай мітусні. Часта з'яўляўся ў горадзе разам з жонкай і малой дачкой. Год таму Лукашэнка ўручыў Яўсееву ордэн «За службу Радзіме» ІІІ ступені.

 




Дата стварэння навіны 28.09.2017

Возврат к списку