АКТУАЛЬНЫЯ ТЭМЫ: Ваеннае становішча ва Украіне Выбары-2019 Праграма ураду Атака на СМІ Мінздраў: карупцыя Забойства Паўла Шарамета

Лукашэнка анансаваў сумесныя з Украінай гуманітарныя канвоі на Данбас

Лукашэнка анансаваў сумесныя з Украінай гуманітарныя канвоі на Данбас
22.07.2017
Кіраўнік Беларусі дадаў, што яго пазіцыя ў дачыненні да канфлікту ва Украіне не змянілася.

president.gov.ua


 Прэзідэнт Украіны Пятро Парашэнка прыняў прапанову Аляксандра Лукашэнкі аб адпраўцы сумесных гуманітарных канвояў на Данбас без пасярэднікаў «па найкароткім шляху». Пра гэта кіраўнік Беларусі заявіў па выніках сустрэчы з Парашэнкам.

 

Лукашэнка адзначыў, што кіраўнікі нямала часу абмяркоўвалі сітуацыю ў Данецкай і Луганскай абласцях Украіны.

 

— Перш за ўсё, я Пятру Аляксеевічу пра гэта сказаў і папрасіў яго, мы пастаўляем гуманітарную дапамогу ў гэтыя вобласці. Мы хацелі б працаваць там без пасрэднікаў і па найкароткім шляху. І прасіў, што калі будзе цікавасць нейкая і ў нас супадуць гэтыя гуманітарныя канвоі, каб мы гэта зрабілі разам. Людзі ж нашы, дзяліць нам няма чаго. Я ўдзячны прэзідэнту і яго калегам, якія пагадзіліся на гэты крок. Мы ў стане сваім людзям (я не лічу іх чужымі) дапамагаць, хто трапіў у бяду».

 

Кіраўнік Беларусі дадаў, што яго пазіцыя ў дачыненні да канфлікту ва Украіне не змянілася.

— Я ніколі не ставіў перад сабой мэту бегчы наперадзе паравоза. Я рабіў, раблю і буду рабіць толькі тое, аб чым мяне папросяць два прэзідэнты, — заявіў Лукашэнка, маючы на ўвазе кіраўнікоў Расіі і Украіны. — Усё, што даручаць мне два прэзідэнты, больш, чым хто-небудзь уцягнутыя ў гэты канфлікт, мы, беларусы, будзем рабіць. Мы не прэтэндуем ні на якія лаўры. Якія могуць быць лаўры, калі гінуць людзі?! Вы — украінцы, павінны ведаць, што ў вас ёсць блізкія і родныя людзі, якія жывуць трохі больш на поўнач, але нічым не адрозніваюцца ад вас. І калі вам цяжка, у чым толькі зможам, мы заўсёды дапаможам.

 

У сваю чаргу, Парашэнка назваў Лукашэнку «добрым сябрам, які заўсёды гатовы нас падтрымаць». Па словах прэзідэнта Украіны, ён у чарговы раз атрымаў запэўніванні, што тэрыторыя «сяброўскай Беларусі ніколі не будзе выкарыстаная для агрэсіі супраць Украіны».

 

Парашэнка дадаў, што яны з Лукашэнкам дамовіліся забяспечыць на ўмовах узаемнасці знаходжанне украінцаў у Беларусі без рэгістрацыі на той жа тэрмін, што і беларусы могуць знаходзіцца ва Украіне.

— Гэта зямля дружбы. Беларусам ва Украіне і ўкраінцам у Беларусі павінна быць камфортна.

 

Сумеснай дэмаркацыйнай камісіі даручылі завяршыць працэс дагаворна-прававога афармлення мяжы Беларусі і Украіны, адзначыў Парашэнка. У бліжэйшы час пастаўленая задача выйсці на 5 млрд даляраў тавараабароту.

 

Бакі дамовіліся ствараць сумесныя прадпрыемствы для вытворчасці ўсіх магчымых тавараў для экспарту ў трэція краіны.

 

Беларусь і Украіна таксама падпісалі праграму супрацоўніцтва паміж краінамі ў сферы культуры на 2017-2021, у сферы міжнацыянальных адносін, пагадненне аб навуковым супрацоўніцтве паміж нацыянальнымі акадэміямі навук.


Автор:  "Беларускі партызан"

Дата стварэння навіны 22.07.2017
Падзяліцеся навіной з сябрамі

Возврат к списку