АКТУАЛЬНЫЯ ТЭМЫ: Атака на СМІ Мінздраў: карупцыя Курапаты Пенсійная рэформа Матулі 328:галадоўка Эканамічны крызіс Забойства Паўла Шарамета

Беларускія навукоўцы распрацоўваюць метад дыягностыкі захворванняў па кроплі крыві

Беларускія навукоўцы распрацоўваюць метад дыягностыкі захворванняў па кроплі крыві
31.05.2017
Навукоўцы распрацавалі матэрыял, які дазваляе выяўляць рэчывы ў вельмі нізкіх канцэнтрацыях. Іх распрацоўка можа быць карысная ў самых розных сферах — ад пошуку злачынцаў да пастаноўкі дыягназаў.

На працягу некалькіх апошніх гадоў беларускія навукоўцы вырабляюць па ўласнай тэхналогіі асаблівыя падкладкі — расходны матэрыял для хімічнага аналізу. Гэтым займаюцца спецыялісты з БДУІР сумесна з калегамі з Інстытута фізікі імя Сцяпанава НАН Беларусі.

На такую падкладку змяшчаюць кроплю раствору і з дапамогай спектрометра дэтэктуюць і вывучаюць малекулы, якія ўваходзяць у яго склад. Асаблівасці матэрыялу дазваляюць рабіць гэта з неймаверна высокай дакладнасцю.

 «Вы можаце дэтэктаваць многія рэчывы ў вельмі нізкіх канцэнтрацыях, — тлумачыць кандыдат тэхнічных навук Ганна Бандарэнка, адзін з аўтараў распрацоўкі. — Гэта дазваляе праводзіць аналіз з дакладнасцю, якой немагчыма дасягнуць з выкарыстаннем іншых метадаў».

 У аснове падкладкі — крэмніевая пласціна са пластом нанаструктураванага матэрыялу пад назвай порысты крэмній. Зверху асаджваюцца наначасціцы срэбра або золата.


 «Сам аналіз праводзіцца досыць хутка. У прынцыпе ён праводзіцца на працягу 30 секунд — хвіліны. Падрыхтоўка ўзору і нанясенне на падкладку — увесь комплекс займае тры гадзіны максімум».

  Выкарыстоўваць такі метад можна ў розных галінах — напрыклад, у крыміналістыцы або медыцыне. У тэорыі такія падкладкі можна выкарыстоўваць для дыягностыкі анкалагічных захворванняў. Цяпер БДУІР і Інстытут фізіялогіі НАНБ пры дапамозе распрацаваных падкладак праводзяць даследаванні, звязаныя з дыягностыкай коларэктальнага раку.

 «У Беларусі пакуль падобныя падкладкі не выкарыстоўваюцца ў клінічнай практыцы. Гэта звязана з неабходнасцю адпрацоўкі методыкі іх прымянення, — распавядае Ганна. — Але за мяжой такім спосабам ужо даследуюць сыроватку крыві. Сыроватка здаровага чалавека мае іншы спектр у параўнанні з сыроваткай чалавека, у якога ёсць захворванне».

 Зыходзячы з досведу замежных калег, укараненне гэтага метаду мае вялікія перспектывы. Але вельмі важна правесці цэлы комплекс даследаванняў для рэалізацыі яго практычнага прымянення, у якіх трэба суладнае ўзаемадзеянне многіх арганізацый.

Па словах навукоўцаў, у іншых краінах такі метад шырока распаўсюджаны. Аднак падкладкі беларускай вытворчасці каштуюць танней. Нюансы вытворчасці даследчыкі трымаюць у сакрэце, каб захаваць цікавасць да свайго прадукту. Цяпер цікавасць да распрацоўкі праяўляюць арганізацыі з Расіі, краін Еўрасаюза і ЗША.

«За мяжой кошт гэтых падкладак складае ад 15 да 75 еўра. У нас кошт адной падкладкі для замежных заказчыкаў вар'іруецца ад 5 да 30 еўра. 5—7 еўра каштуе падкладка на аснове срэбра і каля 30 еўра каштуе падкладка на аснове золата».

У снежні мінулага года артыкул аб распрацоўцы беларускіх даследнікаў апублікавалі ў прэстыжным навуковым часопісе Nanoscale Research Letters. У гэтым чэрвені навукоўцы прадэманструюць сваю распрацоўку на выставе eMerge Americas ў Маямі ў ЗША, а ў ліпені вынікі даследавання прэзентуюць у Партугаліі — на паездку туды яны выйгралі грант.

па инф. nn.by


Дата стварэння навіны 31.05.2017

Возврат к списку